Books | Syed Talib Ali Welfare Trust

لمحۂ فکریہ!!! قرآنی آیات کا سہارا لے کر
مسلم قوم کو فرقوں میں بانٹا جارہا ہے
دوستو! یہ ایک ایسا فکر انگیز عنوان ہے جس پر ہمارے دور کے مسلمان ذرا بھی غور و فکر نہیں کرتے۔ بلکہ اندھی تقلید کرتے ہیں اور سنی سنائی باتوں پر اکڑتے ہیں۔ جس کی وجہ سے مسلم قوم روز بروز فرقوں میں بٹتی جارہی ہے۔ اگر ہم تھوڑا سا وقت نکال کر قرآن میں تدبر کریں اور قرآنی آیات کا ترجمہ پوری توجہ سے پڑھیں اور سمجھیں تو دشمنانِ اسلام کی ایک ایک چال سامنے آجائے گی کہ وہ کس طرح قرآنی آیات کا سہارا لے کر مسلم قوم کو فرقوں میں تقسیم کر رہے ہیں۔ بھائی کو بھائی سے جدا اور مسلمان کو مسلمان سے لڑا رہے ہیں۔
یہاں ہم یہ بتانا بھی ضروری سمجھتے ہیں کہ علماء نے جو دینِ اسلام کے فروغ اور قرآنی تراجم کے سلسلے میں خدمات انجام دیں ہیں۔ اللہ ان سے خوب اچھی طرح واقف ہے اور وہ یقینا اس کی جزاء بھی دے گا۔ لہٰذا ہم کون ہوتے ہیں کہ علماء پر تنقید کریں یا اپنی قابلیت جتائیں بلکہ کیوں نہ ہم اس طرف غور کریں کہ وہ ہمیں ایک کام کی بات سیکھا گئے کہ قرآنی تعلیمات کو سمجھنے کیلئے اس آسمانی کتاب کا ترجمہ اپنی زبان میں آسان سے آسان تر کرنا اتنا ہی ضروری ہے جتنا دیگر علوم کی کتابوںٰ کو اپنی زبان میں سمجھنا ضروری ہے۔ اسی فکری سوچ کے پیش نظر محکمۂ اوقاف کے افسران (اہلکار)، پبلشرز صاحبان اور دورِحاضر کے علماء قرآنی تراجم پر نظرثانی کریں اور قرآن کا انتہائی آسان سے آسان ترجمہ اپنی اپنی مادری زبان میں پیش کریں۔ یقینا ایسا کرنے سے اُن علماء کے رتبے، مرتبے میں کمی نہیں آئے گی جو پہلے قرآنی تراجم کرنے کی سعادت حاصل کرچکے ہیں۔ بلکہ عام فہم لوگ قرآن آسانی سے سمجھ سکیں گے اور قرآنی تعلیمات پر عمل کریں گے اور دشمنانِ اسلام کے تمام فتنہ انگیز عزائم ناکام ہوجائیں گے۔
اس مختصر تمہید کے بعد ان آیات کا ترجمہ پیشِ خدمت ہے جنہیں سنا سنا کر دشمنانِ اسلام نے کس خوبصورتی سے مسلم قوم کو مختلف فرقوں، عقیدوں اور گروہوں میں بانٹ دیا۔
نور کی وضاحت
قَدْ جَآئَ کُم مِّنَ اللّٰہِ نُورٌ وَّ کِتٰبٌ مُّبِیْنٌ (سورۂ المائدۃ ۵/ آیت نمبر ۱۵)۔
ترجمہ: ترجمہ تمہارے پاس اللہ تعالیٰ کی طرف سے ایک روشن چیز آئی ہے اور ایک کتاب واضح۔ (مولانا اشرف علی تھانوی صاحب)۔
ترجمہ: بیشک تمہارے پاس ایک نور آیا اور روشن کتاب (مولانا شاہ احمد خان رضاء بریلوی صاحب)۔
ترجمہ: تحقیق تمہارے پاس آگیا اللہ کی طرف سے نور اور روشن کتاب (حافظ نذر احمد)۔
ترجمہ: بیشک تمہارے پاس خدا کی طرف سے نور اور روشن کتاب آچکی ہے (مولانا فتح محمد جالندھری صاحب)۔
تمام تراجم سے یہ بات واضح ہوگئی کہ تین مترجم نے ’’نور کا ترجمہ نور‘‘ کیا ہے اور ’’کتاب مبین کا ترجمہ روشن کتاب‘‘ لکھا ہے۔ جبکہ ایک مترجم مولانا اشرف علی تھانوی صاحب ’’نور کا ترجمہ روشن چیز آئی‘‘ اور ’’کتاب مبین کا ترجمہ کتاب واضح‘‘ لکھ رہے ہیں۔ مگر چاروں تراجم میں ایک بات مشترکہ ہے کہ اللہ کی طرف سے ایک نور آیا ہے اور واضح کتاب یا روشن کتاب آئی ہے۔
اس مشترکہ بات سے دشمنانِ اسلام کو موقع مل گیا کہ وہ مذکورہ آیت کا ترجمہ بار بار پڑھ کر لوگوں کو سنائیں اور نورٌوکتبٌ کی مختلف تاویلات پیش کریں اور یہ باور کرائیں کہ قرآن کی اس آیت میں اللہ کی طرف سے آنے والا نور محمدﷺ کو کہا گیا ہے۔ بس یہ سن کر بغیر تحقیق کئے ایک فرقہ محمدﷺ کو نور ماننے والوں کا بن گیا۔ جو محمدﷺ کو نور ثابت کرنے کیلئے بڑی بڑی تقریریں کر رہا ہے مگر افسوس کہ اس چھوٹی سے آیت کے ترجمے پر غور نہیں کررہا کہ ایک مترجم نے ’’نور کا ترجمہ روشن چیز آئی ہے‘‘ کیا ہے اور تین مترجم نے ’’نور کا ترجمہ نور‘‘ لکھا ہے آخر کیوں؟؟؟… جبکہ…
لغات القرآن میں نور کے معنی… روشنی، ہدایت، تجلی اور چمک کے ہیں۔
اور کتابِ مبین کے معنی…… روشن کتاب، واضح کتاب، کھلی کتاب کے ہیں۔
دوستو! جب نور کا ترجمہ کرو گے تو بات واضح ہوجائے گی اور آپس کے جھگڑے ختم ہوجائیں گے۔ کوئی فرقہ فرقہ نہیں رہے گا کیونکہ اللہ اس آیت میں صاف صاف فرما رہا ہے کہ
قَدْ جَآئَ کُم مِّنَ اللّٰہِ نُورٌ وَّ کِتٰبٌ مُّبِیْنٌ (سورۂ المائدۃ ۵/ آیت نمبر ۱۵)۔
ترجمہ: تمہارے پاس اللہ کی طرف سے ہدایت اور روشن کتاب آگئی ہے
۔(اسکالر سید محمد علی ایڈیٹر ایجوکیشن نیوز)۔
اسی طرح سورۂ نسا اور سورۂ نور میں اللہ کا فرمان ہے کہ
یٰٓاَیُّہَا النَّاسُ قَدْ جَآئَ کُمْ بُرْہَانٌ مِّنْ رَّ بِّکُمْ وَاَنْزَلْنَآ اِلَیْْکُمْ نُورًا مُّبِیْناً (سورۂ نساء ۴/ آیت نمبر ۱۷۴)۔
ترجمہ: اے لوگو! تمہارے پاس اللہ کی دلیلیں آگئی ہیں اور تمہارے پالنے والے (اللہ) نے تمہاری طرف (نُورًا مُّبِیْناً) واضح ہدایت اتاری ہے۔ (اسکالر سید محمد علی ایڈیٹر ایجوکیشن نیوز)۔
اللّٰہُ نُورُ السَّمٰوٰتِ وَالْاَرْضِمَثَلُ نُورِہٖ کَمِشْکٰوۃٍ فِیْہَا مِصْبَاحٌ الْمِصْبَاحُ فِیْ زُجَاجَۃٍالزُّجَاجَۃُ کَاَنَّہَا کَوْکَبٌ دُرِّیٌّ یُوقَدُ مِنْ شَجَرَۃٍ مُّبٰرَکَۃٍ زَیْْتُونِۃٍ لَّا شَرْقِیَّۃٍ وَّلَا غَرْبِیَّۃٍ یَکَادُ زَیْْتُہَا یُضِیْٓئُ وَلَوْ لَمْ تَمْسَسْہُ نَارٌنُّورٌ عَلَی نُورٍیَہْدِیْ اللّٰہُ لِنُورِہٖ مَن یَّشَائُوَیَضْرِبُ اللّٰہُ الْأَمْثَالَ لِلنَّاسِوَاللّٰہُ بِکُلِّ شَیْْئٍ عَلِیْمٌ (سورۂ نور ۲۴/ آیت نمبر ۳۵)۔
ترجمہ: اللہ آسمانوں اور زمین کی روشنی (نور) ہے اس کی روشنی (نور) کی مثال ایسی ہے گویا فانوس میں ایک روشن چراغ ہے۔ اس کے اوپر شیشے کا غلاف ہے اور وہ غلاف گویا ایک بڑے موتی کی مانند ستارہ ہے۔ اسی میں کسی مبارک درخت کا تیل جلتا ہے اور اس سے (نور علی نور) روشنی پر روشنی نکلتی رہتی ہے اور اللہ جسے چاہے اپنی روشنی سے راہ دِکھا دیتا ہے۔ اللہ انسانوں کو سمجھانے کیلئے ایسی مثالیں دیتا ہے اللہ ہی اصل حال جانتا ہے۔(اسکالر سید محمد علی ایڈیٹر ایجوکیشن نیوز)۔
درج بالا آیات کا ترجمہ پڑھ کر واضح ہوگیا کہ اللہ ہی آسمانوں اور زمین کا نور ہے لہٰذا کسی بندۂ خاص کو نور کہنا یا ماننا اللہ کے مترادف ہے۔
الْوَسِیْلَۃَ اور جَاہِدُوْا کی وضاحت
یٰٓاَیُّہَا الَّذِیْنَ اٰمَنُواْ اتَّقُوا اللّٰہَ وَابْتَغُوْا اِلَیْہِ الْوَسِیْلَۃَ وَجَاہِدُوْا فِیْ سَبِیْلِہٖ لَعَلَّکُمْ تُفْلِحُونَ (سورۂ مائدہ ۵/ آیت نمبر ۳۵)۔
ترجمہ: اے ایمان والو! اللہ تعالیٰ سے ڈور اور خدا تعالیٰ کا قرب ڈھونڈو اور اللہ کی راہ میں جہاد کیا کرو امید ہے کہ تم کامیاب ہوجائو گے۔ (مولانا اشرف علی تھانوی صاحب)۔
ترجمہ: اے ایمان والو! اللہ سے ڈرو اور اس کی طرف وسیلہ ڈھونڈو اور اس کی راہ میں جہاد کرو اس امید پر کہ فلاح پائو۔ (مولانا شاہ احمد خاں رضاء بریلوی صاحب)۔
ترجمہ: اے ایمان والو! ڈرو اللہ سے اور اس کی طرف (اس کا) قرب تلاش کرو اور اس کے رستے میں جہاد کرو تاکہ تم فلاح پائو۔ (حافظ نذر احمد)۔
ترجمہ: اے ایمان والو! خدا سے ڈرتے رہو اور اس کا قرب حاصل کرنے کا ذریعہ تلاش کرتے رہو اور اس کے رستے میں جہاد کرو تاکہ تم رستگاری پائو۔ (فتح محمد جالندھری صاحب)۔
درج بالا تراجم پڑھنے سے یہ بات سامنے آئی کہ مذکورہ آیت میں لفظ ’’الْوَسِیْلَۃَ اور لفظ جَاہِدُوْا‘‘ بہت اہم ہیں کیونکہ تین مترجم ’’الْوَسِیْلَۃَ کا ترجمہ قرب‘‘ لکھ رہے ہیں جبکہ ایک مترجم مولانا شاہ احمد خاں رضاء بریلوی صاحب ’’الْوَسِیْلَۃَ کا ترجمہ وسیلہ‘‘ لکھ رہے ہیں مگر چاروں تراجم میں ایک بات مشترکہ ہے کہ اللہ کا قرب ڈھونڈو یا تلاش کرو اور اس کی راہ یا رستے میں جہاد کرو۔
بس یہ ترجمہ پڑھ کر دشمنانِ اسلام حرکت میں آگئے اور غور کیا کہ مذکورہ آیت میں اللہ کا قرب ڈھونڈنے یا تلاش کرنے کا اشارہ ضرور ہے مگر ذریعہ نہیں ہے۔ بس دشمنانِ اسلام نے سوچا خیر کوئی بات نہیں… چلو ذریعہ ہم بتا دیتے ہیں۔ بس یہی سوچ کر پیرمغاں، پیرکامل اور بابا کراماتی وغیرہ کے قصے، کہانیاں اور کراماتیں گھڑنی شروع کردیں اور لوگوں کو چپکے چپکے بتانے لگے کہ اگر اللہ کا قرب حاصل کرنا چاہتے ہو تو پیرمغاں، پیرکامل اور بابا کراماتی وغیرہ کے پیچھے لگ جائو کیونکہ یہ اللہ کے مقرب (نزدیک) بندے ہیں۔ اللہ ہم سے زیادہ ان کی سنتا ہے اور یہی اللہ کا قرب حاصل کرنے کا وسیلہ ہیں اور اللہ سے مدد اور مرادیں پوری کرانے کا ذریعہ ہیں۔ بس رات دن ان کی خدمت میں حاضر رہو یہ تم کو اللہ کے نزدیک پہنچنے کی ساری ظاہری اور باطنی عبادت کے طریقے سیکھا دیں گے۔ بس یہ باتیں سن کر ایک فرقہ پیرمغاں، پیرکامل اور باباکراماتی کو اللہ کا مقرب اور اللہ کے قرب کا ذریعہ اور اللہ سے مدد اور مرادیں پوری کرانے کا وسیلہ ماننے والوں کا بن گیا۔ جو بڑی بڑی کتابیں لکھ کر اور تقریریں کر کے پیروں، بابائوں کی کراماتیں اجاگر کررہا ہے مگر افسوس کہ مذکورہ آیت کے ترجمے کو غور اور توجہ سے نہیں پڑھ رہا تاکہ حقیقت سامنے آجائے اور دشمنانِ اسلام کی چال سے محفوظ رہے۔ اِدھر دوسرے طرف لفظ جَاہِدُوْا کا ترجمہ جہاد پڑھ کر یورپی ممالک یہ تاثر عام کر رہے ہیں کہ مذہبِ اسلام جبر و تشدد اور دہشت گردی کی ترغیب دیتا ہے جبکہ مذہبِ اسلام امن و سلامتی اور جدوجہد کا درس دیتا ہے کیونکہ
لغات القرآن میں الْوَسِیْلَۃَ کے معنی … دستاویز، قربت کا سبب، ذریعہ کے ہیں۔
اور جَاہِدُوْا کے معنی … جہد کرو، کوشش کرو، سعی کرو، محنت کرو کے ہیں۔ جبکہ جہد کی جمع جہاد ہے۔
لغات القرآن میں الْوَسِیْلَۃَ کے معنی دیکھنے سے معلوم ہوا کہ الْوَسِیْلَۃَ کے معنی دستاویز یعنی کسی امر، حکم، فرمان کا تحریری ثبوت یا وہ سند جس سے اپنا حق ثابت کرسکیں کے بھی ہیں۔ اس سے یہ بات بالکل عیاں ہوتی ہے کہ الْوَسِیْلَۃَ اس آیت میں اللہ کی دستاویز یعنی قرآن کو کہا گیا ہے کیونکہ اللہ کے تمام حکم اور فرمان کی تحریری دستاویز قرآن سے بڑھ کر کوئی اور نہیں ہے۔ اسی لیے اس آیت میں الْوَسِیْلَۃَ کا ترجمہ دستاویز لکھنا زیادہ موزوں ہے۔
دوستو! جب الْوَسِیْلَۃَ اور جَاہِدُوْا کا ترجمہ کرو گے تو بات واضح ہوجائے گی اور آپ کے اختلافات ختم ہوجائیں گے کیونکہ مذکورہ آیت میں اللہ ایک فکر اور ایک پیغام دے رہا ہے کہ
یٰٓاَیُّہَا الَّذِیْنَ اٰمَنُواْ اتَّقُوا اللّٰہَ وَابْتَغُوْا اِلَیْہِ الْوَسِیْلَۃَ وَجَاہِدُوْا فِیْ سَبِیْلِہٖ لَعَلَّکُمْ تُفْلِحُونَ (سورۂ مائدہ ۵/ آیت نمبر ۳۵)۔
ترجمہ: اے ایمان لانے والو! اللہ سے ڈرتے رہو اور اللہ کی دستاویز (قرآن) میں (علم و ہدایت) تلاش کرتے رہو اور اس راہ میں کوشش کرتے رہو تاکہ تم فلاح پائو۔ (سید محمد علی)
اللہ کی حدیث سے ہٹا کر محمدﷺ کی حدیث میں لگا دیا
درج ذیل آیات میں لفظ حدیث، حدیثاً استعمال ہوا ہے
جس کا ترجمہ علماء نے بات، خبر، قصہ، کلام کیا ہے۔
اس دن کافر اور رسول کے مجرم (کفر پھیلانے اورکفر کرنے والے) آرزو کریں گے کہ انہیں پھر زمین میں دفن کر دیا جائے مگر اُس دن اللہ اُن کی کوئی حدیث (بات) نہیں چھپائے گا (رسوا کرے گا){نساء سورت نمبر ۴کی آیت نمبر ۴۲}۔
اللہ وہ ہے جس کے سوا کوئی بندگی کے لائق نہیں۔ وہی قیامت کے دن تم سب کو جمع کرے گا اس میں کوئی شک نہیں۔ اور اللہ سے بڑھ کر سچی حَدِیْثاً (بات) کہنے والا کون ہے{نساء سورت نمبر ۴کی آیت نمبر ۸۷}۔
آسمانوں اور زمین کی مخلوق کو دیکھو اور ان چیزوں کو جو اللہ نے بنائیں ہیں۔ تم کیا جانو اُن (کے فنا ہونے) کا وقت قریب ہی آگیا ہو۔ پھر اس (نشانی) کے بعد یہ کس حدیث (بات) پر ایمان لائیں گے{اعراف سورت نمبر۷ کی آیت نمبر ۱۸۵}۔
اے پالنے والے (اللہ) تو نے مجھے حکومت دی ہے مجھے باتوں کی باریکیاں (تاویل احادیث) سمجھنے کا علم دیا۔ تو ہی آسمانوں اور زمین کو بنانے والا ہے۔ تو ہی دنیا و آخرت میں ہمارا مالک (مولا) ہے مجھے مسلم (اللہ کا فرمانبردار) اٹھانا اور نیکوں میں شامل کرنا{یوسف سورت نمبر ۱۲ کی آیت نمبر۱۰۱}۔
سمجھدار لوگوں کیلئے ان قصوں میں بڑی عبرت ہے۔ یہ (قرآن) ایسی حدیث (باتیں) نہیں جو گھڑلی گئی ہوں۔ یہ تصدیق کرتی ہیں ان کتابوں کی جو پہلے آئی تھیں اور انہی باتوں کی تفصیل (وضاحت) کرتی ہیں۔ یہ اہل ایمان کے لئے ہدایت و رحمت ہیں{یوسف سورت نمبر ۱۲ کی آیت نمبر۱۱۱}۔
اگر یہ اس کلام (بِہٰذَا الْحَدِیْث) پر ایمان نہیں لائیں تو کیا تم کوفت سے اپنی جان ہلاک کر دو گے{کہف سورت نمبر ۱۸ کی آیت نمبر۶}۔
اور جو لوگ لہو الحدیث (جھوٹ روایتیں) گھڑ کر بے علم (جاہل) لوگوں کو اللہ کی راہ سے بہکائیں گے اور ان کو بے وقوف بنائیں گے وہ رسوائی کے عذاب میں پڑیں گے{لقمان سورت نمبر ۳۱ کی آیت نمبر ۶}۔
(وَلَا مُسْتَاْنِسِیْنَ لِحَدِیْثٍ) اور باتوں میں جی لگا کر مت بیٹھے رہا کرو۔{احزاب سورت نمبر ۳۳ کی آیت نمبر ۵۳}۔
اللہ نے اپنی کتاب میں (اَحْسَنَ الْحَدِیْثِ) بہترین باتیں اُتاری ہیں جن میں متشابہات (مثالی) بھی ہیں{زمر سورت نمبر ۳۹ کی آیت نمبر ۲۳}۔
اللہ کا یہ کلام سچائی کے ساتھ پڑھ کر سنایا جاتا ہے پھر یہ کون سی حدیث (باتیں) پڑھ اور سن کر اللہ اور اس کی آیتوں پر ایمان لائیں گے{جاثیہ سورت نمبر ۴۵ آیت نمبر ۶}۔
کیا تمہیں (حدیث الغاشیہ) قیات کی خبر ہے{غاشیہ سورت نمبر ۸۸ کی آیت نمبر ۱}۔
ان سے کہو (فلیاتوا بحدیث مثلہ) پھر تم بھی ایسی حدیث بنا لائو اگر سچے ہو{طور سورت نمبر ۵۲ کی آیت نمبر۳۴}۔
درج بالا آیات پڑھ کر دشمنانِ اسلام نے ایک سوچے سمجھے منصوبے کے تحت مسلمانوں کو انتہائی ہوشیاری سے اللہ کی (حدیث، حدیثاً) باتوں سے توجہ ہٹا کر محمدﷺ کی (حدیث) باتوں میں لگا دیا اور تاویلات یہ بتادیں کہ اللہ نے قرآن میں احکامات نازل فرمائے ہیں جبکہ ان پر عمل کا طریقہ رسولﷺ نے بتایا ہے لہٰذا محمدﷺ کی (حدیث) باتوں کی اہمیت بالکل قرآن کی طرح ہے اور اگر تم رسول کی حدیث سے انکار کرو گے یا نہیں مانو گے تو اسلام سے خارج ہوجائو گے اللہ ناراض ہو جائے گایعنی کافر بن جائو گے اورجہنم میں جلائے جائوگے وغیرہ وغیرہ۔۔۔۔۔ بس مسلمان بے چارے ایسی باتیں سن کر ڈر گئے اور ان کے جال میں پھنستے چلے گئے… لیکن غور نہیں کیا… آج ایک فرقہ اہلحدیث ہی کیا پوری ملتِ اسلامیہ اللہ کے احکام کا طریقہ قرآن میں تلاش کرنے کے بجائے حدیث نبویﷺ میں ڈھونڈ رہی ہے۔ اور لوگ دشمنانِ اسلام کا سنایا ہوا راگ الاپ رہے ہیں کہ قرآن میں صلوٰۃ کا حکم ہے صلوٰۃ کے اوقات، وضو کا طریقہ اور صلوٰۃ کا طریقہ کس سے اور کہاں سے معلوم کریں ایسی باتیں سن کر ہمیں انتہائی افسوس ہوتا ہے کہ بیچارے قرآن پڑھتے ضرور ہیں مگر سمجھتے نہیں۔ بس سنی سنائی پر اکڑتے ہیں کیونکہ قرآن میں اللہ کے چھوٹے سے چھوٹے اور بڑے سے بڑے احکامات کا طریقہ موجود ہے مثلاً مدنی سورت نمبر ۵ مائدہ کی آیت نمبر۶ میں وضو، غسل اور تیمم کا طریقہ ہے۔
قرآن نے وضو، غسل اور تیمم کا طریقہ بتا یا
ترجمہ: اے ایمان لانے والو! جب صلوٰۃ کے لئے جمع ہو تو اپنے منہ اور ہاتھ کلائی تک دھو لیا کرو اور سر اور پائوں کو ٹخنوں تک پونچھ لیا کرو اور جنابت سے ہو تو نہا کر پاک ہوجایا کرو۔ لیکن بیمار ہو یا سفر میں ہو یا رفع حاجت سے آئے ہو یا عورتوں کو چھوا (صحبت کی) ہے اور پانی دستیاب نہیں تو پاک مٹی سے تیمم کرلو یعنی منہ اور ہاتھوں پر اس سے مل لو۔ اللہ تمہارے لئے دشواری نہیں چاہتا بلکہ تمہیں پاک صاف رکھنا چاہتا ہے اور اپنی نعمتوں کو تم پر تمام کرنا چاہتا ہے تاکہ اس کا احسان مانتے رہو{مائدہ سورت نمبر ۵ کی آیت نمبر ۶ }۔
صلوٰۃ کے اوقات قرآنی آیات کے مطابق
ترجمہ: صلوٰۃ کھڑے ہو کر کرو دن کے دونوں سروں پر اور رات کی ابتدائی پہر میں (فجر، مغرب، عشائ)۔ {مکی سورت نمبر ۱۱ ہود کی آیت نمبر ۱۱۴ میںصلوٰۃ کا پہلا حکم ’کھڑے ہو کر صلوٰۃ پڑھو‘ } اب ادب سے اپنے دونوں ہاتھ باندھ لو{۲۸:۳۲}۔
اور اس آیت کے علاوہ مکی سورت نمبر ۲۰ طٰہٰ کی آیت نمبر ۱۳۰ میں، مکی سورت نمبر ۵۰ قٓ کی آیت نمبر ۳۹ میں اور مکی سورت نمبر ۱۷ کی آیت نمبر ۷۸ میں بھی صلوٰۃ کے اوقات درج ہیں۔
سیکھو قرآن سے حالتِ امن میں صلوٰۃ کا طریقہ
بتادیا صلوٰۃ کھڑے ہو کر کرو۔ اور مکی سورت نمبر ۱۵ حجر کی آیت نمبر ۸۷ میں ’سورۂ فاتحہ بار بار پڑھو‘۔ اور مکی سورت نمبر ۲۰ طٰہٰ کی آیت نمبر ۵ میں ’قرآن بلند آواز سے پڑھو‘ اور مکی سورت نمبر ۷۳ کی آیت نمبر ۴ میں ’قرآن کو ٹھہر ٹھہر کر پڑھو۔ اور مدنی سورت نمبر ۲۲ حج کی آیت نمبر۷۷ میں ’رکوع کرو، سجدہ کرو‘ اور مدنی سورت نمبر ۲۲ حج کی آیت نمبر ۷۸ میں ’پس صلوٰۃ (اسی طرح) قائم کرو۔
سیکھوقرآن سے حالتِ جنگ میں صلوٰۃ کا طریقہ
مدنی سورت نمبر ۴ نساء کی آیت نمبر ۱۰۲ میں حکم ہوا کہ ’اے نبی! جب تم اپنے لشکر میں موجود ہو اور ان کیلئے صلات قائم کرو تو چاہیے کہ ایک جماعت تمہارے ساتھ رہے اور دوسرے اپنے ہتھیار سنبھالے رہیں۔ جب وہ سجدہ کرچکیں (ایک رکعت پڑھ لیں) تو چلے جائیں اور دوسری جماعت جس نے صلات نہیں کی ہو وہ آجائیں‘۔
ذرا سی توجہ، غور و فکر سے ہم دشمنانِ اسلام کی سازشوں سے بچ سکتے ہیں اور قرآن میں اللہ کے احکام کے طریقے تلاش کر کے خالص دین اسلام پر عمل کرسکتے ہیں کیونکہ محمدﷺ ہمارے درمیان ایک مکمل اور انتہائی آسان دستاویز (قرآن) چھوڑ گئے ہیں۔ جو ساری کائنات کیلئے ہدایت و فلاح کی کتاب ہے۔
اللہ اکبر ، یااللہ سے ہٹا کر یارسول میں لگا دیا
قَالَ بَصُرْتُ بِمَا لَمْ یَبْصُرُوا بِہِ فَقَبَضْتُ قَبْضَۃً مِّنْ اَثَرِ الرَّسُولِ فَنَبَذْتُہَا وَکَذٰلِکَ سَوَّلَتْ لِیْ نَفْسِیْ {سورۂ طٰہٰ ۲۰/ آیت نمبر ۹۶}۔
ترجمہ: اس نے کہا مجھ کو ایسی چیز نظر آئی تھی جو اوروں کو نظر نہیں آئی تھی، پھر میں نے اس فرستادہ (خداوندی کی سواری) کے نقشِ قدم سے ایک مٹھی (بھرخاک) اٹھالی تھی سو میں نے وہ مٹھی (قالب کے اندر) ڈال دی اور میرے جی کو یہی بات پسند آئی۔
۔(مولانا اشرف علی تھانوی صاحب)۔
ترجمہ: بولا میں نے وہ دیکھا جو لوگوں نے نہیں دیکھا تو ایک مٹھی بھرلی فرشتے کے نشان سے پھر اسے ڈال دیا اور میرے جی کو یہی بھلا لگا۔(مولانا شاہ احمد خاں رضا بریلوی صاحب)۔
ترجمہ: (اس نے) کہا مجھے وہ چیز دکھائی دی جو اوروں کو نہیں دکھائی دی (جبرائیل کو دیکھا کہ وہ گھوڑی پر سوار جارہے ہیں) تو میں نے (جبرائیل) فرشتے (کی گھوڑی) کے نقشِ قدم (کی مٹی) سے ایک مٹھی بھر لی پھر اس کو (ڈھلے ہوئے بچھڑے میں) ڈال دیا (اور وہ بھائیں بھائیں کرنے لگا) اور (اس وقت) میرے دل نے مجھ کو ایسی ہی صلاح دی۔(شمس العلماء مولوی نذر احمد دہلوی صاحب)۔
ترجمہ: وہ بولا میں نے وہ دیکھا جس کو انہوں نے نہیں دیکھا پس میں نے فرشتے کے نقشِ قدم سے ایک مٹھی بھرلی تو میں نے وہ (بچھڑے کے قالب) میں ڈال دی اور اسی طرح میرے نفس نے مجھے پھسلایا۔ (حافظ نذر احمد صاحب)۔
ترجمہ: اس نے کہا کہ میں نے ایسی چیز دیکھی جو اوروں نے نہیں دیکھی تو میں نے فرشتے کے نقشِ پا سے (مٹی کی) ایک مٹھی بھر لی پھر اس کو (بچھڑے کے قالب میں) ڈال دیا اور مجھے جی نے (اس کام کو) اچھا بتایا۔ (مولانا فتح محمد جالندھری صاحب)۔
درج بالا تراجم پڑھ کر ایک بات سامنے آئی کہ پانچوں مترجم نے ’’اَثَرِ الرَّسُولِ‘‘ کا ترجمہ فرشتے کے نقشِ قدم لکھا ہے جبکہ لفظ ’’اَثَرِ‘‘ ’نقش، تعویز، جادو، منتر‘ کے معنی میں استعمال ہوتا ہے اور ’’الرَّسُولِ‘‘ ’پیغمبر، رسول، بھیجے، قاصد‘ کے معنی میں استعمال ہوتا ہے۔ اور فرشتے کے معنی میں بھی استعمال ہوتا ہے۔ لہٰذا مان لیتے ہیں اس آیت میں ’’الرسول‘‘ فرشتے کو کہا جا رہا ہے تو تب بھی ’’اَثَرِ الرَّسُولِ‘‘ کا ترجمہ ’’فرشتے کا جادو، تعویذ، منتر یا نقش ہوا، نہ کہ فرشتے کے نقشِ قدم۔ جبکہ پانچوں مترجم نے فرشتے کے قدم لکھا ہے۔ پس جب اس بات پر غور کیا تو حقیقت سامنے آئی کہ سامری ایک سنار تھا اور سونے کی چیزیں بنانے کا ماہر تھا اور جانتا تھا کہ لوگ موسیٰ کے اللہ پر ایمان تو لے آئے ہیں۔ مگر کچھ لوگ اب بھی موسیٰ کے معجزات کو ایک جادو ہی سمجھتے ہیں۔ بس اس نے سونے کے زیورات پگھلا کر ایک بچھڑا بنایا اور من گھڑت سنا کر موسیٰ کی قوم کو اللہ کی بندگی سے ہٹا دیا اور بچھڑے کی پوجا میں لگا کر گمراہ کر دیا۔ جسے قرآن میں یوں بیان کیا گیا ہے۔
قَالَ بَصُرْتُ بِمَا لَمْ یَبْصُرُوا بِہِ فَقَبَضْتُ قَبْضَۃً مِّنْ اَثَرِ الرَّسُولِ فَنَبَذْتُہَا وَکَذٰلِکَ سَوَّلَتْ لِیْ نَفْسِیْ {سورۂ طٰہٰ ۲۰/ آیت نمبر ۹۶}۔
ترجمہ: وہ بولا میں نے وہ دیکھا جو میرے ساتھ والوں نے نہیں دیکھا کہ میں نے ایک مٹھی (اَثَرِ الرَّسُولِ) رسول کے جادو سے (فرشتے کے جادو سے) بھرلی اور اسے (بچھڑے میں) ڈال دی (جس سے اس میں آواز پیدا ہوگئی) اور اسی طرح (سامری نے) اپنے دل سے یہ بات گھڑلی۔ ( اسکالر سید محمد علی ایڈیٹر ایجوکیشن نیوز)۔
یہاں ہمارا مقصد مترجم پر تنقید کرنا نہیں بلکہ اس طرف توجہ دلانا ہے کہ قرآنی مختلف آیات میں لفظ ’’الرسول، رسولٌ، رسولٍ، رسولۃ‘‘ استعمال ہوا ہے۔ جس کا ترجمہ علماء نے ’’فرشتہ، رسول، پیغمبر، پیغام رساں، قاصد‘‘ کے تحریر کیے ہیں۔ اور ’’یا‘‘ کا ترجمہ ’اے، او‘ کیا ہے۔ جبکہ بعض آیات میں لفظ ’’یارب‘‘ بھی استعمال ہوا ہے جس کا ترجمہ ’’اے رب‘‘ تحریر ہے۔ بس یہ سب دیکھ کر کسی یہودی کی رگِ شرارت پھڑکی جس نے اپنے استاد سامری کے طریقے پر عمل کیا اور یارب کی طرح قرآنی دو لفظ ’’یااور رسول‘‘ کو ملا کر ’’یارسول ‘‘ لکھ کر پیش کر دیا اور موسیٰ کی قوم کی طرح مسلم قوم کو ’’اللہ اکبر، یااللہ‘‘ سے ہٹا کر ’’یارسول‘‘ میں لگا دیا۔ بیچارے مسلمان آج تک نہیں سمجھے کہ وہ کس رسول کو پکار رہے ہیں کیونکہ سورہ ۱۹ مریم کی آیت نمبر ۱۹ اور سور ۳۵ فاطر کی آیت نمبر۱ میں فرشتے کو بھی رسول کا کہا گیا ہے… اگر لغات اٹھا کر دیکھ لیتے تو دشمنانِ اسلام کی چال میں نہیں آتے اور آپس میں اختلاف بھی نہیں ہوتا کیونکہ لفظ ’’یا‘‘ دیکھنے والا ، حاضر و ناظر اور موجود کے معنی میں استعمال ہوتا ہے۔ اور یہ صفت سوائے اللہ کے کسی کو حاصل نہیں۔
یاد رکھیے!!! ہم سچے عاشق ہیں منکر رسول یا منکر صلوٰۃ و سلام نہیں ہیں کیونکہ ہم صلوٰۃ و سلام کے معنی اچھی طرح جانتے ہیں اور سمجھتے ہیں کہ صلوٰۃ ’’بندگی، عبادت گاہ اور دعا‘‘ کے معنی میں استعمال ہوتا ہے اور سلام ’’کسی پر سلامتی بھیجنے‘‘ کے معنی میں استعمال ہوتا ہے۔ بس جس طرح قرآن میںرسول پر سلام بھیجنے کا حکم ہے اس طرح بھیجا جائے تو اللہ کے حکم کی پیروی اور باعثِ ثواب ہے۔ اور اس سے ہٹ کر بھیجا جائے تو اپنی خواہشات کی پیروی ہے اور یاد رکھیں کہ اپنی خواہشات کی پیروی کرنے والوں کو اللہ عذاب دیتا ہے… غور کیجئے… کیونکہ قرآن میں واضح لفظوں میں لکھا ہے۔
وَسَلٰمٌٌ عَلَی الْمُرْسَلِیْنَo وَالْحَمْدُلِلّٰہِ رَبِّ الْعٰلَمِیْنَ
ترجمہ: رسول پر سلام بھیجتے ہیں اور جہانوں کے پالنے اللہ کا شکر اور تعریف کرتے ہیں۔
۔(سورت نمبر ۳۷ صفت کی آیت نمبر ۸۱ ۱ اور ۱۸۲)۔
اَلْعَلِیُّ سے تو جہ ہٹاکر ’’مولا علی‘‘ میں لگا دیا
اللہ وہ ہے جس کے سوا کوئی بندگی کے لائق نہیں۔ وہ زندہ ہے، قائم رہنے والا ہے، اسے نہ اونگھ آتی ہے نہ نیند۔ آسمانوں اور زمین میں جو کچھ ہے اُسی کا ہے۔ مجال نہیں کہ اُس کی اجازت کے بغیر کوئی اُس سے سفارش کرے۔ جو کچھ پہلے ہوچکا اور جو کچھ بعد کو ہونے والا ہے وہ سب جانتا ہے۔ تم اُس کے علم سے کسی جزو کا بھی احاطہ نہیں کرسکتے جب تک وہ خود نہ دینا چاہے۔ اس کی کرسی اقتدار آسمانوں اور زمین کو گھیرے ہوئے ہے اور اس کے لئے اُن سب کی حفاظت دشوار نہیں۔ (وَہُوَالْعَلِیُّ الْعَظِیْمُ) وہ بڑا عالی مرتبہ اور عظمت والا ہے{بقرہ سورت نمبر ۲کی آیت نمبر ۲۵۵}۔
بلاشبہ (اِنَّ اللّٰہُ کَانَ عَلِیًّا کَبِیْرًا) اللہ بلند مرتبہ اور جلیل القدر ہے{نساء سورت نمبر ۴ کی آیت نمبر ۳۴}۔
اس سے معلوم ہوا کہ اللہ ہی حق (سچائی) ہے اور جن کو یہ لوگ اُس کے سوا پوجتے ہیں وہ سب باطل خدا ہیں۔ (وَاِنَّ اللّٰہُ ہُوَ الْعَلِیُّ الْکَبِیْرُ) بلاشبہ اللہ ہی سب سے اعلیٰ و اکبر ہے{لقمان سورت نمبر ۳۱ کی آیت نمبر۳۰}۔
اللہ کے آگے کسی کی شفاعت نہیں چلے گی سوائے اُس کے جس کو اللہ اجازت دے۔ اس دن جب دل ذرا قابو میں آئیں گے تو پوچھیں گے یہ کون ہے۔ کہیں گے یہی تمہارا رب ہے۔ بولیں گے یہی سچا رب ہے (وَہُوَ الْعَلِیُّ الْکَبِیْرُ) اور وہ بڑا عالی مرتبہ اور گرامی قدر ہے{سباء سورت نمبر ۳۴ کی آیت نمبر۲۳}۔
وَاِنّہُ فِیْٓ اُمِّ الْکِتٰبِ لَدَیْنَا لَعَلِیٌّ حَکِیْمٌ
اور بیشک یہ اُم الکتاب (کتابوں کی ماں کا حصہ) ہے جو تمہارے بلند مرتبہ اور صاحبِ حکمت (مالک) کی طرف سے اترتی ہے{زخرف سورت نمبر ۴۳ کی آیت نمبر ۴}۔
آپ نے مندرجہ بالا آیات پڑھیں اسی طرح قرآن کی مختلف آیات میں لفظ ’’اَلْعَلِیُّ‘‘ استعمال ہوا ہے۔ جس کے معنی بلندی والا، برتری والا، بڑائی والا، عالی مرتبہ کے ہیں۔ اسم صفات ہونے کی وجہ سے اس لفظ کو عربی میں ’’اَلْعَلِیُّ‘‘ لکھتے ہیں۔ جیسے عربی میں کِتٰبُ اور قُرْاٰنُ کو اسم بنانے کے اَلْکِتٰبُ اور اَلْقُرْاٰنُ لکھتے ہیںلیکن اردو میں انہیں کتاب اور قرآن ہی لکھا جاتاہے۔ اسی طرح ’’اَلْعَلِیُّ‘‘ کو اردو میں علی ہی لکھا اور پڑھا جاتا ہے۔ اردو اور عربی کی گرامر کے فرق کی وجہ سے دشمنانِ اسلام نے اللہ کے اسمِ صفات ’’اَلْعَلِیُّ‘‘ سے لوگوں کی توجہ ہٹا کر مولا علی، مولا مشکل کشاء علی، یاعلی مدد میں لگا دیا بھائی کو بھائی سے جدا کرنے اور مسلمان کو مسلمان سے لڑانے کیلئے علی شیرا خدا سے منسوب کردیا۔ اگر مسلمان تھوڑی سے توجہ دیتے تو نہ آپس میں جھگڑتے اور نہ جدا ہوتے کیونکہ لغات میں مولا علی کے معنی ’’بلندی والے، بڑائی والے مالک‘‘، مشکل کشاء علی کے معنی ’’مشکل کو حل فرما تو عالی مرتبہ ہے‘‘ اور یاعلی مدد کے معنی ’’اے بڑائی والے مدد فرما‘‘۔ لہٰذا قرآن کی رو سے اور لغات کے معنوی اعتبار سے مولاعلی، مشکل کشاء علی، یاعلی مدد کہنا یعنی اللہ کو مدد کیلئے پکارنا اور اس کی بڑائی بیان کرنا ہے۔
لفظ اولیاء اور ولی کی وضاحت
دوستو! بیشتر قرآنی آیات میں لفظ ولی اور اس کی جمع اولیاء استعمال ہوا ہے جس کے معنی اردو میں علمائے دین مولانا اشرف علی تھانوی صاحب، مولانا شاہ احمد خاں رضا بریلوی صاحب، مولانا فتح محمد جالندھری صاحب، حافظ نذر احمد صاحب اور دیگر مترجم دوست، رفیق، حمایتی، ساتھی اور مددگار تحریر کر رہے ہیں۔ ایسی چند آیات کا ترجمہ پیشِ خدمت ہے جن آیات میں لفظ اولیاء اور ولی استعمال ہوا ہے۔
شیطان کے اولیاء وہ ہیں جو ایمان والوں کو ڈراتے ہیں
اہلِ ایمان کا ولی (دوست) صرف اللہ ہے جو انہیں (جہل کے) اندھیروں سے نکال کر (علم کی) روشنی میں لاتا ہے۔ مگر جو لوگ کفر (حق بات سے انکار) کرتے ہیں وہ شیطان کے اولیائ(دوست) ہیں۔ وہ انہیں روشنی سے اندھیروں میں لے جاتا ہے۔ یہی لوگ آگ میں جلنے والے ہیں۔ وہاں ہمیشہ رہیں گے{۲-سورۂ بقرہ: آیت نمبر ۲۵۷}۔
بے شک شیطان اپنے اولیاء (دوستوں) سے اسی طرح ڈراتا ہے۔ مگر تم ان سے نہ ڈرو صرف مجھ سے ڈرتے رہو اگر صاحبِ ایمان ہو{۳-سورۂ آلِ عمران: آیت نمبر ۱۷۵}۔
شیطان کے ولی بن جائوگے
۔(ابراہیم نے کہا اگر آپ اللہ پر ایمان نہیں لائے تو) ابا جان مجھے ڈر ہے کہ آپ پر بڑے مہربان (اللہ) کا عذاب آئے گا اور آپ شیطان کے ولی بن جائیں گے{۱۹-سورۂ مریم: آیت نمبر۴۵}۔
شیطان کو اپنا اولیاء بنالیتے ہیں
تو کچھ لوگ ہدایت قبول کرلیتے ہیں اور کچھ پر گمراہی مقدر ہوجاتی ہے تو وہ اللہ کو چھوڑ کر شیطان کو اپنا اولیاء (رفیق) بنالیتے ہیں اور سمجھتے ہیں کہ وہ بڑے ہدایت یاب ہیں{۷-سورۂ اعراف: آیت نمبر ۳۰}۔
اللہ کے احکام کے سوا کسی اولیاء کی پیروی مت کرو
کہ اے لوگو! اُن احکام کی پیروی کرو جو تمہارے رب کی طرف سے اُترتے ہیں اور اُس کے سوا کسی اولیاء (رفیق) کی پیروی مت کرو۔ مگر تم میں نصیحت ماننے والے کم ہیں{۷-سورۂ اعراف: آیت نمبر ۳}۔
یہودی اور عیسائی ایک دوسرے کے اولیاء ہیں
اے ایمان لانے والو! یہودیوں اور عیسائیوں کو اپنے اولیاء (حمایتی) نہیں جانو یہ آپس میں ایک دوسرے کے اولیاء (حمایتی) ہیں۔ اور تم میں سے جو اِن سے مل جائے وہ انہی میں شمار کیا جائے۔ اللہ ظالموں کی قوم کو ہدایت نہیں دیتا{۵-سورۂ مائدہ: آیت نمبر ۵۱}۔
ایمان والو! ایک دوسرے کی حمایت کرو ورنہ فتنہ و فساد پھیل جائے گا
اور کافر آپس میں ایک دوسرے کے اولیاء (حمایتی) ہیں پس (مومنو!) اگر تم (ایک دوسرے کی حمایت و مدد) نہیں کرو گے تو دنیا میں فتنہ و فساد پھیل جائے گا{۸- سورہ انفال: آیت نمبر۷۳}۔
اللہ کے اولیاء وہ ہیں جو اللہ سے ڈرتے ہیں
اور یاد رکھو اللہ کے دوست (اولیائ) نہ خوفزدہ ہوتے ہیں نہ مغموم{۱۰/۶۲} یعنی وہ جو ایمان لاتے ہیں اور گناہوں سے بچتے ہیں{۱۰-سورۂ یونس: آیت نمبر۶۳}۔
اللہ کے سوا تمہارا کوئی اولیاء نہیں
اور ظالموں کی طرف کبھی مائل نہیں ہونا ورنہ آگ میں ڈالے جائو گے۔ اور اللہ کے سوا تمہارے لئے کوئی اولیاء (مددگار) نہیں ہیں پھر مدد کہاں سے آئے گی{۱۱-سورۂ ہود: آیت نمبر۱۱۳}۔
مندرجہ بالا قرآنی آیات کا ترجمہ پڑھ کر یہ بات سمجھ میں آگئی ہوگی کہ اللہ نے شیطان کے اولیاء اور اللہ کے اولیاء کی خوب اچھی طرح پہچان کرادی اور صاف صاف بتا دیا ہے کہ جو لوگ کفر (حق بات سے انکار) کرتے ہیں وہ شیطان کے اولیاء (دوست) ہیں۔ اور جو لوگ ایمان لاتے ہیں اور اللہ سے ڈرتے ہیں وہ اللہ کے اولیاء (دوست) ہیں۔ مگر یہودی اور عیسائی ایک دوسرے کے اولیاء (حمایتی) ہیں۔ جبکہ سورۂ اعراف کی آیت نمبر ۳ میں اللہ نے ایک واضح حکم دیا ہے کہ ان احکام کی پیروی کرو جو تمہارے پالنے والے (اللہ) کی طرف سے اترتے ہیں اور اس کے سوا کسی اولیاء (رفیق) کی پیروی مت کرو۔ اور سورۂ انفال ۸/ آیت نمبر ۷۳ میں ایک نصیحت کی ہے کہ کافر آپس میں ایک دوسرے کے اولیاء (حمایتی) ہیں۔ پس (مومنو!) اگر تم (ایک دوسرے کی حمایت، مدد) نہیں کرو گے (یعنی بھٹکے ہوئوں کو صراط مستقیم کی طرف نہیں بلائو گے) تو دنیا میں فتنہ و فساد پھیل جائے گا۔ اور سورۂ ہود کی آیت نمبر ۱۳ میں سزا سنادی کہ ظالموں کی طرف کبھی مائل نہیں ہونا ورنہ آگ میں ڈالے جائو گے۔
مگر ہم لوگ اللہ کا حکم نصیحت اور سزا غرض سبھی کچھ بھول گئے اور دشمنانِ اسلام کی چال میں ایک بار پھر آگئے کیونکہ فتنہ و فسادگرد ذہنوں نے اولیاء اللہ اور ولی اللہ کے قصے، کہانیاں، داستانیں اور کراماتیں وغیرہ گھڑ کر لوگوں میں چپکے چپکے پھیلا دیں۔ بس ان من گھڑت باتوں سے متاثر ہو کر ایک فرقہ ولی اللہ اور اولیاء اللہ کے ماننے والوں کا وجود میں آگیا۔ اتنا سب کچھ ہونے کے باوجود نہ تو ہم لوگ ہوش میں آئے نہ ہمارے علماء جاگے؟… آخر کیوں؟؟؟… یہ ایک سوال ہے جو مجھے بے چین کرتا رہتا ہے۔
آپ ہماری اس کاوش کو پڑھ کر چونک گئے ہوں گے اور سوچ رہے ہوں گے یہ کون ہے جو سچ کو سچ لکھ رہا ہے اور حق کو حق بتا رہا ہے… آخر یہ کیا چاہتا ہے؟… اس کا مقصد کیا ہے؟… اور کیوں اپنی جان خطرے میں ڈال رہا ہے؟… جبکہ ہر طرف فرقہ پرستی، مطلب پرستی اور موقع پرستی کی آگ لگی ہوئی ہے… آپ کے تمام سوالوں کا ہمارے پاس ایک ہی جواب ہے کہ ہماری مثال اس چڑیا کی سی ہے جو کسی ہادی یا مہدی کے انتظار میں بیٹھنے کے بجائے خود اپنی چونچ میں بھرے پانی کے قطرے سے جنگل کی آگ بجھانے کی کوشش کر رہی ہے۔ اور اپنے پالنے والے (اللہ) سے دعا کر رہی ہے کہ اے اللہ! میری اس کوشش کو قبول و مقبول فرما اور اپنی رحمت کی بارش سے اس آگ کو سرد کردے اور ہمارے آشیانے کو بچالے۔ بے شک تو ہی مدد کرنے والا ہے۔ (’’ربنا وتقبل دعا‘‘ اے پالنے والے اللہ میری دعا قبول فرما۔ )
وَمَا عَلَیْْنَا إِلاَّ الْبَلاَغُ الْمُبِیْنُ
اور ہمارے ذمہ صرف اللہ کا پیغام پہنچا دینا ہے{۳۶/۱۷}۔